ТОШКЕНТ, 5 ноябрь. /«Дунё» АА/. «Ўзбекнефтгаз» АЖ Россиянинг «ВЭБ.РФ» давлат тараққиёт корпорацияси билан 40 миллион еврогача кредит линиясини очиш бўйича шартнома имзолади, деб хабар бермоқда «Дунё» АА мухбир.
«Ўзбекнефтгаз» АЖ матбуот хизматига кўра, жорий йилнинг сентябрь ойида «ВЭБ.РФ» раиси ?гор Шувалов бошчилигидаги делегациянинг Ўзбекистонга ташрифи чоғида «Ўзбекнефтгаз» АЖ ва «ВЭБ.РФ» раҳбарияти билан амалий учрашувлар бўлиб ўтган эди.
Тадбир давомида томонлар Ўзбекистон Республикаси нефть ва газ саноатидаги лойиҳалар учун давлат тараққиёт корпорациясининг кредит маблағларини жалб этишни ташкил этиш бўйича келишувга эришган эди.
Қайд этилишича, ушбу маблағлар 2021 йил 150 га яқин нефть ва газ қудуқларини бурғилаш ва йирик таъмирлаш ишларини ўтказиш учун моддий-техник ресурсларни ўз вақтида таъминлаш имконини беради.
Чора-тадбирлар Ўзбекистон Республикаси иқтисодиёти эҳтиёжлари учун углеводород ишлаб чиқаришнинг режалаштирилган кўрсаткичларига эришишни таъминлайди.
