ТОШКЕНТ, 12 январь. /«Дунё» АА/. Умумий қуввати 1000 МВт бўлган шамол электр станциялари Бухоро вилоятининг Пешку ва Ғиждувон ҳамда Навоий вилоятининг Канимех туманларида жойлашиши учун энг мақбул ҳудуд деб танланди, деб хабар бермоқда «Дунё» АА мухбири Энергетика вазирлиги манбасига асосланиб.
Қурилиш ишлари «АCWА Power» (Саудия Арабистони) компаниясининг 100 фоиз тўғридан-тўғри инвестицияси эвазига амалга оширилмоқда. Лойиҳанинг умумий қиймати 1,3 миллиард АҚШ долларини ташкил этади.
Кейинги босқич шамол йўналишларини аниқлаш учун ускуналарни ўрнатиш бўлди. Бугунги кунга қадар танланган ҳудудларда шамол йўналишларини (кўрсаткичларини) қайд этиш учун 10 та метеорологик устун (мачта) ва 1 та спайдер ўрнатилди. Яна 7 та метеорологик устун ўрнатиш босқичида.
Ушбу қурилмалар шамол тезлиги, йўналиши ва давомийлиги, шунингдек, об-ҳаво ҳароратининг ўзгариши кўрсаткичлари каби маълумотларни ўлчаш учун 100 ва 120 метр баландликларда ўрнатилади.
Ҳозирга қадар танланган ер майдонларининг топографик ва геотехник тадқиқотлари якунланди. Олинган маълумотлар асосида ҳисобот тайёрланмоқда. Гидрологик тадқиқотлар давом этмоқда.
Маълумот учун, «ACWA Power» компанияси дунё бўйича ўзининг 32 та корхонасига эга. Компания бугунги кунда Яқин Шарқ, Шимолий ва Жанубий Африка ҳамда Жанубий-Шарқий Осиё мамлакатларининг 12 давлатида қатор лойиҳаларни амалга ошириб келмоқда. Компания электростанциялар қуриш, жумладан, иссиқлик, қуёш ҳам шамолдан электр энергияси ишлаб чиқариш ҳамда денгиз сувини чучуклаштириш лойиҳасини амалга ошириш билан шуғулланади.
