ТОШКЕНТ, 4 ноябрь. /«Дунё» АА/. Жорий йилнинг 2-4 ноябрь кунлари Бирлашган Миллатлар Ташкилоти Озиқ-овқат ва қишлоқ хўжалиги ташкилоти — ФАО Минтақавий конференциясининг Европа учун ўттиз иккинчи сессияси ташкил этилди, деб хабар бермоқда «Дунё» АА мухбири.
Ўзбекистон мезбонлигида ташкил этилган мазкур нуфузли виртуал йиғилишда Европа ва Марказий Осиёнинг ФАОга аъзо 53 та давлати, Еврокомиссия делегатлари, шунингдек халқаро ташкилотлар вакилларининг 400 га яқин вакили иштирок этди.
ФАОнинг Европа ва Марказий Осиё бўйича Минтақавий конференциясининг 32-сессиясида Ўзбекистон Қишлоқ хўжалиги вазири Жамшид Ходжаев 2022 йилгача ФАОнинг юқори бошқарув органи ҳисобланадиган Минтақавий конференцияга раис этиб сайланди.
Анжуман иштирокчилари бутун минтақа учун долзарб бўлган озиқ-овқат хавфсизлиги ва аграр секторни ривожлантириш масалаларини шакллантиргани ва муҳокамага қўйгани учун Ўзбекистон ҳукуматига самимий миннатдорлик билдирди.
Қайд этиш керакки, мамлакатимиз вакиллари фаолият доирасида амалга ошириладиган лойиҳаларни бошқариб, мувофиқлаштириб, ҳал қилувчи таклифларни киритади. Конференция раиси Минтақавий конференциянинг 2020-2023 йилларга мўлжалланган иш режасини амалга оширишга кўмаклашади ва барча тадбирларни мувофиқлаштиради. Кейинги конференцияга қадар минтақада ФАО фаолияти билан боғлиқ ҳар қандай консультациялар, ташаббуслар ва дастурлар Конференция раиси билан ҳамкорликда амалга оширилади.
Шунингдек, тадбирда йиғилганлар мулоқотни мустаҳкамлаш зарурати, шунингдек кучайган пандемия шароитида мамлакатлар ўртасидаги қатъий ҳамкорлик алоқаларига алоҳида эътибор қаратди.
