АНҚАРА, 14 июль. /«Дунё» АА/. Туркиянинг “Kanimed Alles Sag'lik Cozumleri A.S» компанияси бош директори Филиз Эрдоган Марашлиоглу “Дунё” АА мухбирига берган интервьюсида COVID-19 пандемияси шароитида компаниясининг Ўзбекистонда фаол бизнес юритиши учун барча шароит яратиб берилганини, юзага келган қийинчиликлар ортиқча расмиятчиликсиз, ўзаро ишонч руҳида ҳал этиб келинаётганини қайд этди.
– COVID-19 дунёда экспорт-импорт таъминоти занжири, пул ўтказмалари ва бизнес алмашинуви учун тўсиқлар пайдо қилмоқда. Аммо ана шундай қийин ва кутилмаган ҳолатларда Ўзбекистоннинг хориждаги дипломатик ваколатхоналари самарали фаолият юритмоқда.
Хусусан, коронавирус пандемияси сабаб карантин чекловлари жорий қилиниши ортидан ўзбекистонлик шерикларимиз билан ҳамкорлигимизда айрим узилиш ва муаммолар юзага келди. Шундан сўнг Ўзбекистоннинг Туркиядаги элчихонасига мурожаат қилдим. Дипломатик ваколатхона юзага келаётган муаммоларни ҳал қилиш бўйича аниқ таклифларга зудлик билан муносабатда бўлди ва келгусидаги фаолиятимизда тўсиқлар юзага келмаслиги учун биз билан доимий алоқада бўлиб турди. Ҳеч қандай расмиятчилик, протокол талабларисиз, тўғридан-тўғри, самимий ёндашув, тезкор ва самарали профессионал фаолият намойиш этилди.
Компаниямиз Наманганда Диализ марказини, Термизда эса Диагностика лаборатория марказини ташкил этишни режалаштирган. Лойиҳаларни амалга ошириш учун вилоят раҳбарлари ва туман ҳокимликлари билан қатор учрашувлар ўтказдик. Дастлабки босқичда 3 миллион АҚШ долларидан зиёд тўғридан-тўғри инвестицияни жалб қилган ҳолда объектлар жойлашуви ва инвестиция лойиҳаларини амалга ошириш бошқа жиҳатларини ўрганиб чиқдик.
Ўзбекистон доим ўзининг улкан салоҳияти, мамлакатнинг қатъиятли раҳбарияти ва ислоҳотларнинг самарадорлиги билан мени ўзига жалб қилиб келади. Ўзим учун кашф қилган мамлакатнинг яна бир ўзига хос хусусияти бу – қийинчиликларни енгиб ўтишда ҳаракатларни мувофиқлаштириш қобилиятидир. Зеро, бугун кўз ўнгимизда тўғри қурилган бошқарув тизими ўз самарасини бермоқда.
Ўзбекистон дунёнинг кўплаб давлатлари каби пандемия ва унинг оқибатларидан азият чеккан бўлиши мумкин, аммо республика глобал инқироздан чиқиб, янада кучлироқ ва ривожланган давлатга айланишига ишонаман.
