ТОШКЕНТ, 3 июль. /“Дунё” АА/. Бу ҳақда Халқаро автомобиль транспорти иттифоқи (ХАТ?) Бош котиби Умберто де Претто Ўзбекистон Республикаси ташқи ишлар вазирининг биринчи ўринбосари Фарҳод Арзиев билан бўлиб ўтган видеоконференция чоғида айтиб ўтди, деб хабар бермоқда “Дунё” АА мухбири.
Ташқи ишлар вазирлиги Ахборот хизмати маълумотига кўра, учрашувда таъкидланганидек, COVID-19 пандемияси билан боғлиқ муаммоларга қарамай, жорий йилнинг 6 ойи мобайнида Ўзбекистонда юк ташиш (TIR Carnet) китобчаларидан фойдаланиш миқдори ўтган йилнинг шу даврига нисбатан 32 фоизга кўпайди. Ушбу кўрсаткичнинг ўсиши 2019 йил якуни бўйича ундан олдинги йилга нисбатан 46 фоизни ташкил этган эди.
Умберто де Претто БМТнинг Европа иқтисодий комиссияси доирасида юкларни автомобилда халқаро ташиш тизимини рақамлаштиришни (eTIR) қўллаб-қувватлагани, шу жумладан, 1975 йилдаги Юкларни халқаро йўлларда ташиш китобчасини қўллаш бўйича Божхона конвенциясига 11-иловани жорий йилнинг бошида қабул қилинишида фаол иштирок этгани учун Ўзбекистон ҳукуматига миннатдорлик билдирди.
Ўзбек томони ХАТ? билан яқин ҳамкорликни чуқурлаштиришдан ҳамда республиканинг халқаро транспорт йўлакларида иштирок этиш географиясини кенгайтиришдан манфаатдор эканини яна бир бор тасдиқлади.
Таъкидланганидек, реал вақт режимида ишлайдиган ишончли халқаро электрон маълумотлар базасининг мавжудлиги ҳисобига ҳужжатларни қоғозда расмийлаштирмасдан юк ташишни жорий этиш божхона органлари ва ташувчиларнинг ишини сезиларли даражада осонлаштиради, унинг хавфсизлигини оширади ва ушбу жараённи тезлаштиради.
Видеоконференция якунида иштирокчилар юкларни етказиб бериш босқичларида ва тажриба тариқасидаги «eTIR» ташишларни амалга оширишда COVID-19 пандемиясининг салбий оқибатларини камайтириш бўйича чора-тадбирларни белгилаб олдилар.
Шунингдек, мазкур тадбирда ХАТ?, Транспорт вазирлиги, Давлат божхона қўмитаси ва Ўзбекистон халқаро автомобилда юк ташувчилар уюшмаси раҳбар вакиллари ўз маъруза ва тақдимотлари билан иштирок этди.
