БРЮССЕЛЬ, 22 июль. /«Дунё» АА/. Гаагада Ўзбекистоннинг Бенилюкс мамлакатларидаги элчиси Дилёр Ҳакимов мамлакатимиздаги фаолиятини якунлаётган дипломат, Нидерландиянинг Москвадаги элчихонасида қишлоқ хўжалиги масалалари бўйича маслаҳатчи Мьювес Брауэр билан учрашди, деб хабар бермоқда «Дунё» АА мухбири.
Элчимиз ҳамкор мамлакат дипломатига Ўзбекистон билан Нидерландия ўртасидаги муносабатларни ривожлантиришга қўшган ҳиссаси учун миннатдорлик билдирди.
Мьювес Брауэр Нидерландия етакчи агросаноат компанияларининг савдо ваколатхоналарини Ўзбекистонда очишда ташаббус кўрсатгани таъкидланди. Бундан ташқари, сўнгги уч йилда қатор ташрифлар ва делегациялар учрашувлари ташкил этилди. Бу эса қишлоқ хўжалиги соҳасида икки томонлама ҳамкорликни фаоллаштириш учун замин яратди.
Эътибор учун миннатдорлик билдирган Мьювес Брауэр ўзбекистонлик ҳамкасблари билан ҳамкорлик қилишдан мамнун эканини қайд этди. Унинг сўзларига кўра, Ўзбекистон қишлоқ хўжалиги соҳасида катта тажриба ва салоҳиятга эга.
«Мамлакатингизга бир неча бор қилган ташрифларимда бунга амин бўлдим. Ўзбекистон — серқуёш, меҳнаткаш ва ташаббускор одамлар яшайдиган мамлакат. Ушбу учта омил қишлоқ хўжалигини муваффақиятли ривожлантиришнинг муҳим омилидир», деди у.
Бундан ташқари, Мьювес Брауэр мамлакатимизда қишлоқ хўжалигини ривожлантиришнинг 2020-2030 йилларга мўлжалланган стратегияси қабул қилинганини юқори баҳолади. Унинг билдиришича, стратегия юртимизда соҳани ривожлантириш йўлини белгилаб берди.
«Биз, нидерландиялик мутахассислар стратегияни амалга ошириш бўйича «Йўл харитаси»ни ишлаб чиқишда қатнашаётганимиздан мамнунмиз. Чорвачилик, ветеринария медицинаси, уруғчилик, ўсимликшунослик, замонавий иссиқхона мажмуаларини қуриш, сувни тежайдиган технологияларни жорий этиш, кадрлар тайёрлаш ва бошқа соҳаларда ҳамкорликни кенгайтиришга тайёрмиз», деди дипломат.
Дипломат жорий йилнинг декабрь ойида Тошкентда ўтказиладиган «AgroExpo Uzbekistan» кўргазмасида Нидерландиянинг қатор компаниялари иштирок этишни режалаштираётганини айтиб ўтди. Делегация таркибига Нидерландиянинг «Агритерра» нотижорат агро-агентлиги вакиллари ҳам кириши масаласи ўрганилаётгани қайд этилди. Улар ўзбекистонлик фермерлар учун фермерлик ташкилотлари ва кооперативларни ривожлантириш бўйича семинар ўтказади.
Бундан ташқари, 2021 йил март ойида «AgroWorld Uzbekistan» кўргазмасида иштирок этиш учун Нидерландия компанияларининг Ўзбекистонга учинчи савдо ваколатхонасини ташкил қилиш ва республиканинг минтақаларидан бирига ташриф буюриш режалаштирилган.
Нидерландия томони янги, қуритилган ва қайта ишланган қишлоқ хўжалиги маҳсулотларини Ўзбекистондан етказиб берувчиларнинг катта қизиқишини ҳисобга олган ҳолда, ушбу савдо миссиясида мамлакатнинг энг йирик импортёрларини ҳам таклиф қилмоқчи.
Учрашув якунида Мьювес Брауэрга Нидерландия элчихонасининг қишлоқ хўжалиги масалалари бўйича маслаҳатчиси сифатидаги фаолияти учун миннатдорлик белгиси сифатида Бенилюкс мамлакатларидаги мамлакатимиз элчихонасининг фахрий дипломи топширилди.
