ВАШ?НГТОН, 5 май. /«Дунё» АА/. Канадада “Евроосиё кичик ва ўрта корхоналари учун виртуал маслаҳатлар тури” доирасида Ўзбекистон халқ амалий санъати намуналари ва қуритилган меваларининг видео-кўргазмаси ташкил қилинди, деб хабар бермоқда “Дунё” АА мухбири.
Кўргазма Ўзбекистон Республикасининг Канададаги элчихонаси (ваколатхонаси Вашингтон шаҳрида жойлашган) ҳамда Россия ва Евроосиёдаги Канада бизнес ассоциацияси (CERBA) билан ҳамкорликда, канадалик чакана сотувчилар ва якка тартибдаги тадбиркорлар учун ташкил қилинди.
Тадбирда 30 дан ортиқ Канада компаниялари ва тадбиркорлари, шунингдек, Беларусь, Қозоғистон ва Россиядаги озиқ-овқат, косметика ва болалар ўйинчоқлари соҳасида фаолият юритувчи 18 та корхона ҳамда фабрика вакиллари иштирок этди.
Унда Ўзбекистон Савдо-саноат палатаси раиси, «Ҳунарманд» уюшмаси раҳбарияти, «Агробизнес» ташкилоти ҳаммуассислари, «Garden Cells», “Gulnora Art” ва “Craft and Art” компаниялари директорлари мамлакатимиз вакиллари сифатида қатнашди.
Кўргазма очилишида “CERBA”нинг Оттава вилоятидаги минтақавий директори М.Бельских сўзга чиқиб, мазкур тадбирда иштирок этиш имкони яратилгани учун мамлакатимиз вакилларига миннатдорлик билдирди. Канадада Ўзбекистон ҳунармандларига савдо уйлари, шунингдек, миллий ҳунармандчилик буюмлари дўконларини очишда ҳар томонлама ёрдам кўрсатишга тайёр эканини таъкидлади.
М.Бельских, шунингдек, мамлакатимиз озиқ-овқат саноатининг анъанавий – қуритилган мевалар ишлаб чиқариш йўналишини юқори баҳолади, Ўзбекистон сўнгги йилларда ушбу маҳсулотларни чет элларга етказиб бериш бўйича Марказий Осиёда етакчилардан бирига айланганини қайд этди.
Ўзбекистон Савдо-саноат палатаси раиси А.?кромов 2017 йилдан буён Россия ва Евроосиёдаги Канада бизнес ассоциацияси билан ҳамкорлик қилиб келиши, ушбу шериклик доирасида икки мамлакат бизнес вакиллари Ўзбекистон ва Канада муваффақиятли фаолият юритиб келаётганини айтиб ўтди.
Дарҳақиқат, сўнгги уч йилда “CERBA” билан биргаликда ўтказилган қўшма форумлар ҳар икки мамлакат ўрта ва кичик бизнес вакилларини бирлаштирмоқда. Канадалик инновацион компаниялар, айниқса, нефть-газ ва кимё саноатига катта қизиқиш билан қарамоқда.
Ўз навбатида, «La Petite Russie» дўкони директори А.Гонтмахер тарихи ва кўп асрлик анъаналари туфайли ўзбек маданияти Канадада машҳур эканини таъкидлади. У Ўзбекистоннинг «Ҳунарманд» уюшмаси билан ҳамкорликни ўрнатиш ташаббусини қўллаб-қувватлади ва ҳозирги босқичда ишбилармонлик алоқаларини ўрнатиш, уюшма фаолияти тўғрисида маълумот олиш, дунёга машҳур ўзбекистонлик ҳунармандлар маҳсулотларини тақдим этиш зарурлигига эътибор қаратди.
«PRInternational» компаниясининг таъминот бўлими бошлиғи Ч.Сетиенна Ўзбекистоннинг «Garden Cells» ва «Агробизнес» компаниялари билан ҳамкорлик қилишга тайёрлигини маълум қилди. Унинг таъкидлашича, компания 40 дан ортиқ мамлакатнинг турли қуритилган мевалари, уруғлари ва донларини Канадага импорт қилади ва тарқатади.
Ўзбекистоннинг АҚШдаги фахрий консули К.Лопез мамлакатимизда ҳунармандлар томонидан ишлаб чиқарилаётган маҳсулотлар сифатига юқори баҳо берди. Унинг билдиришича, ўтган йили Санта-Фе шаҳрида ўтказилган анъанавий Халқ амалий санъати халқаро бозорида ўзбекистонлик 20 дан ортиқ ҳунарманд иштирок этиб, анъанавий санъатнинг турли йўналишларида ўз ижод намуналарини, хусусан, ипак ва жундан тўқилган гиламлар, либосларни намойиш этган.
Кўргазмада “GULNOR LLC” савдо уйи вакили Г.Одилова “?роқи” услубидаги ипакдан тайёрланган анъанавий тўқимачилик маҳсулотларини тақдим этди. Мамлакатимизнинг қадимий ва замонавий қиёфасини уйғунлаштирган ўзбек тўқимачилик санъатининг нодир намуналари иштирокчиларда катта қизиқиш уйғотди.
Мазкур кўргазма Канада компаниялари ва ишбилармонларининг Ўзбекистон халқ амалий санъати маҳсулотлари ва қуритилган меваларига бўлган қизиқишини янада оширишга хизмат қилди. Унинг доирасида маҳсулот етказиб бериш бўйича ҳамкорлик алоқаларини ўрнатишга имкон яратилди.
Тадбир сўнгида “CERBA” компанияси билан ҳамкорликда яқин вақтларда Ўзбекистонда тўқимачилик маҳсулотларининг видео кўргазмасини ташкил қилишга келишиб олинди.
