ТОШКЕНТ, 28 июнь. /“Дунё” АА/. «Тошкент» республика фонд биржаси (РФБ)да «Asia Alliance Bank» акциядорлик тижорат банкининг 45 миллиард сўмлик корпоратив облигациялари жойлаштирилиши якунланди. Бу рўйхатга олинган облигацияларнинг 90 фоиздан ортиғини ташкил этади, деб хабар бермоқда “Дунё” АА мухбири.
Капитал бозорини ривожлантириш агентлиги манбасида келтирилишича, «Asia Alliance Bank» акциядорлик тижорат банки чиқарган корпоратив облигацияларнинг рўйхатдан ўтган ҳажми 50,0 миллиард сўмни ташкил этади. Номинал қиймати – 1,0 миллион сўм, муомала муддати – 7 йил (ёки жойлаштирилган кундан бошлаб 2557 кун). Ушбу облигацияларнинг даромадлилиги Ўзбекистон Республикаси Марказий банкининг қайта молиялаштириш ставкасига тенг бўлиб, йилига + 4 фоизни ташкил этади. Облигациялар бўйича чораклик фоиз тўловлари ҳам кўзда тутилган. Облигациялар «Тошкент» РФБ листингига кириб, очиқ айланиши мумкин.
Маълумот учун, «Asia Alliance Bank»нинг 100 фоиз акцияларига Ўзбекистон Республикаси давлат активларини бошқариш агентлиги эгалик қилади. «Asia Alliance Bank» Ўзбекистондаги ёш ва жадал ривожланаётган, лойиҳаларни молиялаштириш соҳасидаги фаол банклардан биридир.
Банк 2011 йилнинг ноябрь ойидан бошлаб «Moody’s Investor Service» халқаро рейтинг агентлигининг рейтингларига кирган. У, шунингдек, “Контрагент узоқ муддатли хатарларини банк томонидан баҳолашда (CR Assessment) – B1 (cr) даражаси, депозитларнинг узоқ ва қисқа муддатли рейтингларида – В2 даражасига эга.
Бундан ташқари, молия институти 2019 йилнинг ноябрь ойида “Ўзбекистоннинг йил банки" номига сазовор бўлди. У «Тошкент» РФБнинг биржа котировкаси рўйхатига киритилган бўлиб, корпоратив облигациялар бозорида биржа савдоларнинг фаол иштирокчиси ҳисобланади.
2020 йилнинг 5 ойи якунига кўра, “Asia Alliance Bank” умумий активлари бўйича 18-ўринни (2,5 триллион сўм) ва капитал ҳажми бўйича 20-ўринни (305 миллиард сўм) эгаллаб турибди. Банкнинг кредит портфели 1,7 триллион сўм – барча банк кредитларининг 0,7 фоиз ҳажмида шакллантирилган.
Қайд этилишича, банкнинг 2019 йилдаги соф фойдаси 27,2 миллиард сўмни ташкил этади. Бу 3.0 миллион АҚШ долларига тенг.
