ДЕҲЛ?, 22 сентябрь. /«Дунё» АА/. Ҳиндистон PHD Савдо-саноат палатаси томонидан гибрит шаклда «Destination CIS» («Мақсаддаги манзил МДҲ») номли 2-халқаро конференция-кўргазма ташкил этилди, деб хабар бермоқда «Дунё» АА мухбири.
Тадбирдан кўзланган мақсад Ҳиндистон ҳамда МДҲ мамлакатлари ўртасидаги савдо ва сармоявий кооперация имкониятларни ўрганиш, улар ўртасида ҳамкорлик алоқаларини янада кенгайтиришдан иборат бўлди.
Конференция-кўргазма доирасида алоҳида тематик ва махсус сессиялар, В2В форматида виртуал мулоқотлар бўлиб ўтди. Унда Ҳиндистон ишбилармон доираларининг 150 га яқин вакили қатнашди.
Тадбирнинг очилиш қисмида Ўзбекистон, Озарбайжон, Белоруссия, Қозоғистон, Қирғизистон ва Тожикистоннинг Ҳиндистондаги ҳамда Ҳиндистоннинг Беларусдаги дипломатлари қатнашди.
Ўзбекистоннинг Ҳиндистондаги дипломатик ваколатхонаси раҳбари Дилшод Аҳатов иштирокчиларга мамлакатимизда амалга оширилаётган кенг кўламли иқтисодий ислоҳотлар, жумладан юртимизда бизнес юритишнинг афзалликлари, хорижий инвесторлар учун яратилаётган сармоявий имкониятлар ҳамда қулай тадбиркорлик муҳити ҳақида батафсил маълумот берди. Элчи шунингдек, бу имкониятлардан фойдаланган ҳолда ҳинд тадбиркорларини фармацевтика, соғлиқни сақлаш, таълим, АКТ, сунъий интелект, тўқимачилик, туризм ҳамда қишлоқ ҳўжалиги соҳаларидаги инвестиция лойиҳаларини амалга оширишга таклиф қилди.
PHD Савдо-саноат палатаси, ҳинд ишбилармон доиралари вакиллари юртимизда тадбиркорликни қўллаб-қувватлаш ва ривожлантириш йўлида олиб борилаётган кенг қамровли ислоҳотлар, ташқи савдони жадал илгари суриш борасидаги амалий қадамларини эътироф этди. Улар, шунингдек, хорижий сармоядорлар учун яратилган қулай шарт-шароитларни юқори баҳолаб, Ҳиндистон ишбилармонларининг Ўзбекистон билан ҳамкорлик алоқаларини янада чуқурлаштиришга қизиқиши тобора ортиб бораётганини таъкидлади.
