ТОШКЕНТ, 30 июль. /«Дунё» АА/. Германиянинг “FinanzNachrichten.de” интернет нашрида Ўзбекистон Бош вазири ўринбосари, инвестициялар ва ташқи савдо вазири Сардор Умурзоқов бугун, 30 июль куни Немис кичик ва ўрта бизнес Федераль уюшмаси президенти Марио Оховен билан учрашуви ҳақида маълум қилинди, деб хабар бермоқда «Дунё» АА мухбири.
Қайд этилишича, видеоконференцалоқа шаклидаги учрашувда томонлар Ўзбекистон иқтисодий сиёсатининг жорий ҳолатини муҳокама қилади.
Тадбирда инвестициялар ва ташқи савдо вазирининг биринчи ўринбосари Лазиз Қудратов ва Ўзбекистоннинг ГФР даги Элчиси Набижон Қосимов иштирок этади.
Немис нашрининг хабарига кўра, онлайн-конференция давомида мамлакатимизга сармоя киритган ёки ўзлари учун янги бозорларни очишдан манфаатдор германиялик тадбиркорлар Ўзбекистон вакилларига ўзларини қизиқтирган саволлар билан мурожаат қилиш имконига эга бўлади.
Германия матбуотининг таъкидлашича, Ўзбекистон табиий захираларга бой мамлакатдир. Буюк Британия журнали “The Economist”да 2019 йил якунига кўра, демократиялаштириш ва иқтисодий ислоҳотлар соҳасида олиб борган муваффақиятли сиёсат учун Ўзбекистонни “Йил мамлакати” дея эътироф этди. Нуфузли журнал асосий эътиборни Марказий Осиё мамлакатидаги солиқ ислоҳоти ва валюта бозорини қайта тартибга солиш масалаларига қаратган.
Сиёсий барқарорлик ва Ўзбекистон парламенти томонидан мамлакатнинг Евроосиё иқтисодий иттифоқига (ЕО??) қўшилишда кузатувчи мақомини олиш бўйича қарори германиялик тадбиркорларда ҳам қизиқиш уйғотди. Боиси Ўзбекистон Германиянинг кичик ва ўрта бизнес уюшмаси билан ҳамкорлик қилувчи энг муҳим шерик саналади.
Марио Оховен масофавий учрашув олдидан немис нашри мухбирига ўз фикрларини билдирар экан: “Биз кичик ва ўрта бизнес кўламини халқаро даражада кенгайтириш ва ҳамкорликни ривожлантиришни ўз вазифамиз деб биламиз”, дея қайд этди.
